Plantun de Prouvènço

Pèr coumpara dos planto d'encò nostre

Orobanche laserpitii-sileris & Nicotiana glauca

Orobanche laserpitii-sileris

Orobanchaceae

Nom en français : Orobanche du sermontain.

Descripcioun :
Aquesto grando erbo-de-taurèu, raro au nostre, trachis dins li roucaio e lis esboudèu. Parasito l'angelicasso-de-mountagno (Laserpitium siler), ço qu'es un bon mouien de la recounèisse. Fai partido dóu group qu'a l'estigmate jaune e la labro de flour d'en bas bourdado de péu. Sèmblo proun à Orobanche kochii.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 30 à 70 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Orobanche
Famiho : Orobanchaceae

Ordre : Lamiales

Coulour de la flour : Jauno
Petalo : irreguliero
Ø (o loungour) flour : 22 à 30 mm
Flourido : Printèms - Estiéu

Sòu : Ca
Autour basso e auto : 500 à 1200 m
Aparado : Noun
Jun à juliet

Liò : Roucaio - Esboudèu
Estànci : Subremediterran à Subaupen
Couroulougi : Ouroufito-Sud-Éuroupenco
Ref. sc. : Orobanche laserpitii-sileris Reut. ex Jord., 1846

Taba(-verdau)

Nicotiana glauca

Solanaceae

Noms en français : Tabac arborescent, Tabac glauque.

Descripcioun :
Lou taba-verdau es un aubret que trachis au nostre dins li fendasclo di vièi paret e de roucas. Nous vèn d'Americo dóu miejour (Argentino) ounte se vèi fin qu'à 3 700 m d'auturo. Se recounèis à si fueio pourtado pèr un long pecou e verdalo coume la tijo peréu bluio, e tambèn bonodi si lòngui flour jauno en tube.

Usanço :
Emai aguèsson pas li mémi prouprieta qu'aquéli de Nicotiana tabacum, li fueio seco soun fumado pèr lou pople "Quechua" alor que li "Cahuilla" se n'en sèrvon en emplastre pèr garri li plago, li macaduro e li fleiroun, e pèr sougna lis enflige (edèmo). Mèfi de n'en pas manja li fueio, soun mourtalo ! La decoucioun de fueio, richo en nicoutino e anabasino (alcalouïde), pòu servi dins l'ort pèr tua li nieroun.